Bad mood awiii

البوست ده انا هكتبو بالعاميه بسبب طبيعة الموضوع ,, هو موضوع كتير منكو هيشوفوه تافه بس انا شيفاه حيوى و لازم كلنا ننتبهلو ,, انا من ساعة ما اخدت الاجازه و انا كل ما اخش على الماسنجر او الياهو الاقى كل الشباب اللى عندى كتبين جمله واحده فى المعنى مع اختلاف الصيغه و هيا جملة (بااااااااااااااد موووووووود اوىى )انا لاحظت ده فى الاجازه و لما اعدت افكر فى السبب معرفتش الاقى اى تفسير و بينى و بنكو انا نفضت و قلت دى اكيد صدفه بس بعدها بكام يوم كنت اعده بتفرج على برنامج تافه كالعاده و كانو مستضيفين ممثله و جت سيرة الاكتئاب فلقتها بتقول انها عانت من الاكتئاب فى فتره من قترات حياتها و انها راحت لدكتور نفسى و انه قالها ان دى فتره عاديه و ان من العادى انك تصابى بالاكتئاب فى الفتره دى ليـــــــــــــــــــه بقى؟؟؟؟ عشان الشباب لازم يمروا بفترة اكتئاب و ان الفتره دى عندهم بتبقى فترة نضج فكرى يعنى انتقال من مرحله فكريه لمرحله اخرى
انا اوام اوام قمت رابطه ما بين كلام الدكتور و الظاهره اللى لسه حكيلكوا عنها و لما اعدت افكر اقتنعت بكلامه بينى و بنكم بس لما اعدت افكر تانى لاقيت ان المرحله دى بتطول اوى مع الناس اللى اعرفهم فحسيت ان كلام الدكتور ده ممكن يكون غلط او ممكن اننا نطبقوا على حالات فرديه بس بردو موصلتش لسبب الاكتئاب ده ,, هل ممكن يكون بسبب ان الشاب بيكون عندوه خوف من المستقبل و انه ممكن ميلاقيش غير وظيفه بكام الف . او ممكن يكون بسبب خوف البنت انها متقدرش تختار العريس المناسب
من وسط التسع عرسان اللى هيتقدملها ؟,, مش عرفا انا احترت اوى يبقى اكيد كلام الدكتور صح الصح

بس ده لو كده يبقى انا بقالى تلت سنين بمر بمرحلة نضج فكرى